آذربایجان دئموکرات فیرقه‌سی مرکزی کمیته‌سی‌نین بیاناتی
آذربایجانین خالق شاعری، آذربایجان دئموکرات فیرقه‌سی‌نین عضوو سهراب طاهیر 2016 ایل مای آیی‌نین 4-ده باکی شهرینده دونیاسینی ده ییشدی. آذربایجان دئموکرات فیرقه‌سی‌نین کمیته‌سی بو گؤرکملی شاعر و سیاسی خادیمین خاطره‌سینی عزیز توتا‌راق، بوتون فیرقه عضو‌لرینه، خصوصیله مرحومون عائله عضو‌لرینه درین حوزنله باشساغلیغی وئریر. سهراب طاهیر 1926 ایل آوقوست آیی‌نین 6-دا آستارا شهرینده زحمتکئش و انقلابچی بیر عائله‌ده دونیایا گؤز آچدی. او،هله اوشاق اولارکن آتاسی ابوالفضل طاهیرزاده سیاسی فعالیتینه گؤره کرمانشاه شهرینه سورگون ائدیلدی.
1941- جی ایل رضا شاه حکومتی دؤوریلدیکدن سونا او، عائله‌سی ایله بیرلیکده تبریزه کؤچدو.
1946– جی ایلین آپریل آییندا(1324-جو ایلین سوو) او، بیر قروپ فیرقه گنجلری ایله بیرلیکده تحصیل آلماق اوچون سووئت آذربایجانی‌نین پایتختی باکی شهرینه اعزام اولوندو. او، آفیسئرلیک کورسونو بیتیرمه‌سینه باخمایا‌راق 21 آذر حرکاتی‌نین نتیجه‌سینده یارانمیش میللی حکومت مغلوب اولدوغو اوچون وطنه قاییدا بیلمه‌دی. سهراب طاهیر 1952-جی ایلده باکی‌نین پئداکوژی اینستیتوتونا داخیل اولدو و 1957-جی ایلده ادبیات فاکولته‌سینی موفقیتله بیتیردی.
او، تحصیلینی باشا ووردوقدان سونا آذربایجان دئموکرات فیرقه‌سی‌نین اورقانی “آذربایجان” قزئتینده ادبی بؤلمه‌نین مسئولو وظیفه‌سینده چالیشدی.
1984-جو ایلدن آذربایجان ژورنا‌لی‌نین باش رئداکتورو و همین تشکیلاتین یازیچی‌لار جمعیتی‌نین اداره هیئتینین عضوو وظیفه‌سینده فعالیت گؤستردی. عینی زاماندا او، همین تشکیلاتین مرکزی کمیته‌سی‌نین عضوو و باکی شهر کمیته‌سی‌نین تشکلات مسئولو تعیین ائدیلدی.
2006- جی ایلده سهراب طاهیر آذربایجان ادبیاتی ساحه‌سینده گؤستردیگی لاییقلی خیدمت‌لرینه گؤره آذربایجان رئسپوبلیکاسی دؤولتی طرفین‌دن خالق شاعری مئدا‌لی ایله تلتیف اولوندو.
او، بیر نئچه رومان، شعر کیتابی و اونلارجا ادبی مقاله‌لرین مؤلفی‌دیر.
2016 ایل مای آیی‌نین 5-ده مرحومون جنازه‌سی یازیچی‌لار، شاعرلر، فیرقه نماینده‌لری و هابئله چوخلو سهراب سئورلرین مشایعتی ایله آذربایجان رئسپوبلیکاسی‌نین 2-جی فخری خیابانیندا تورپاغا تاپشیریلدی.
آدی و خاطره‌سی ابدیاشار اولسون.
آذربایجان دئموکرات فیرقه‌سی‌نین مرکزی کمیته‌سی
05.05.2016