وطن حصرتی
وطندن آیری دوشموش قریبلره،
خصوصأ آتام احمد شیبانیه اتحاف ائدیرم
وطندن اوزاقدا یاشاییریق بیز،
حصرتدن آلیشیر، یانیر قلبیمیز.
گرکدیر هر کسده اولسون لیاقت،
وطنه محبت، تورپاغا حرمت.
***
وطن، وطن دئیر دیلیم هر زمان،
آیریلیق ئولومدن بئتر درد ایمیش.
خیالا دالاراق دوشونورم من،
تانرینین قیسمتی ندن بئلیمیش؟
***
وطن تورپاغینا، داشینا قوربان
قارلی داغلارینین باشینا قوربان،
سنینله باغلیدیر خاطره لریم،
اوشاقلیق ایللریم، گنجلیک ایللریم.
***
گزیب تورپاغینی کاش قاریش – قاریش،
چبخایدیم سیرینه بیر سییاح کیمی،
اونوتمارام سنی هئچ وقت، هئچ زمان
وطنه لایقلی بیر ائولاد کیمی.
***
سما اوسته اوچان بیر قوش اولایدیم،
حرلنیب باشینا دوره وورایدیم،
سن ایسه لقمان اولوب، بیر تبیب اولوب،
یارالی قلبیمیزه ملحم قویایدین.
***
او تایدان آنالارین آح – ناله سی،
قریب بالاسینا چاتماییر سسی.
بو تایدا قریبلر وئریب باش – باشا،
سویله یر دردینی دوستا، سیرداشا
***
«بورا دا وطندیر، عزیزدیر» – دئیب
تسللی وئریریک بیر – بیریمبزه.
اجل شربتینی کونولسوز ایچیب،
کوچوروک آخیرت منزیلیمیزه.
فرحناز شیبانی
مهاجرتده
(ایوب نمینی نین کئچدییی آغیر و مشقتلی حیات یولونون
و شاهدی اولدوغو حادثه لرین موتیولری اساسیندا قلمه آلدیم)
شاختالی چوغوونلو بیر قیش آخشامی،
آیریلدیم یوردومدان، دوغمالاریمدان.
قلبیمده غم – قصه، من آح گتیریدیم،
وطن دن وطنه پناه گتیردیم.
***
محطین آمانسیز ضربه لریندن،
بیلمه دیم حیاتدان کوسوم، باریشیم؟
ظلمو، حاقسیزلیغی گوزومله گوروب،
حاق دان، عدالت دن نجه دانیشیم؟
***
وطن دن، تورپاقدان سوز دوشن زمان،
باشیمین اوستونو بورویور دومان،
ئوتن ایللریمین خوشبخت چاغلاری،
گوزلریم ئونونده جانلانیر او آن.
***
ایسته رم بیر آنلیق چتین ده اولسا،
زمانین چارخینی قایتارام گئری.
سیلرم عمرومون صحفه سیندن،
بختیمه یازیلان قارا گونلری.
***
جسور اوغوللارین، جسور قیزلارین،
آزادلیق اوغروندا ووروشانلارین،
یازیلسین تاریخه قهرمانلیغی،
شهید مزاریندا اویویانلارین.
فرحناز شیبانی
آلین یازیسی
هرنین بیر جوره قسمتی واردیر،
حیات مبارزه، بیر امتحاندیر.
عمرون هر لحظه سی، هر دقیقه سی،
یادداشا حک اولان شیرین خیالدیر.
***
بیری نین حیاتدا خوش گذرانی،
یاشایر فیرا وان، نعمت ایچینده،
بیری نین نه گئجه سی ، نه گوندوزو وار،
دایم چاپالاییر ذلت ایچینده.
***
بیری تک – تنهادیر، کیچیک دنیاسی،
بیری ده اوغلوندان، قیزیندان راضی.
بیری نین ائولادینین یوخدور فایداسی.
حیاتدان کوسگوندور، اوزونده کدر،
چکدییی زحمتی گئدیبدیر حدر.
قوروموش آغاجین بوداقلاریدیر،
” قوجالار ئوی“ نین قوناقلاریدیر.
***
خیر ایشلر گوروب، یاخشیلیق ائتسن،
تانرینین گوزونده اوجالاجاقسان،
حرمت ائت قوجالارا، اونوتما کی، سن،
واخت گلر، ئوزونده قوجالاجاقسان.
***
مرد اولوب، نامرده بویون ایمه یک،
ایریه ایری، دوزه دوز دئیک،
کونول سیندیرمایاق، قلبه دیمه یک،
چالیشاق هر شئیین قدرینی بیلک.
***
اویمایاق هیچ زمان شهرته، آدا،
کچمیشی خاطرلاییب، سالاق بیز یادا.
تاماهکار اولمایاق دولته، وارا،
او دنیا مالیدیر، قالار دنیادا.
***
یر وئرک قلبیمیزین درینلیینده،
گول- چیچک اطیرلی ساف محبته.
ائله یاشایاق کی، قوی چوریلمه سین،
اولوی دویغولارین سونو نفرته.
***
یاشیل دون گئینسین آنا طبیعت،
هر یردن گوللرین عطری دویولسون.
سعادت، خوشبخت لیک، امین- آمانلیق،
بوتون یر اوزونون تحفه سی اولسون.
فرحناز شیبانی