مشروطه آناياساسي ايرانين دولت قورولوشوندا
عمله گتيرديكي ده يشيكلر حاقيندا
مشروطه حركاتينين باشلانغجينين اساس سببي ئولكه نين اجتماعي-اقتصادي و سياسي-حقوقي دورومونون زامانين طلبلرينه هيچ بير وجه ايله جواب ورمه مه سيدي.
استحصال قوه لرينين انكشاف ائتمه مه سي اجتماعي مناسبتلرين ده ايره له يشينين قارشسيني آليردي. انسان حقوقلارينين نظره آلينماماسي،اجتماعي عدالتين قورونماماسي و سائره بو كيمي عدالتسيزليكلرين اساس سببي دولت اداره ائتمه فورماسينين گئريچيليندن خبروريردي.
ئولكه نين آغيراجتماعي-اقتصادي دورومومينللرله ايشچي قوه سيني و ايشله ين بيني ئولكه ني ترك ائتمه يه مجبوراديردي. روسيه ده ايشله مك اوچون 1858-ده ايران-روس سرحدينده 4852 نفر انسانا پاسپورت وريلميشدي(1). اونلار عموميتله تفليسه،گنجه يه،شوشايا،باكي يا و زاقافقازييانين ديگر شهرلرينه ايشلمه يه گئديرديلر.بو آخين 19-جي عصرين آخيرلاريندا داها گئنيش وسعت آلميشدير.گوني آذربايجاندان و ئولكه نين ديگر ماحالاريندان شمالي آذربايجانا و زاقافقازييانين باشقا شهرلرينه گئدنلرين سايي 1891-ده 26855نفر،1900-جي ايلده 16627 نفر، 1903-ده 32866 نفر اولموشدور(2).بونلار رسمي فورمادادولت قيدّياتيناآلينانلاردي.
م.س. ايوانوفون ورديي معلوماتا گوره او تايدان بو تايا گله نلرين سايي 200 ميندن آرتيق اولموشدور. بئله چوخلو ايشچي قوه سينين مهاجرتينه ا.كسروي ده” تاريخ مشروطييت” آدلي كتابيندا قيد ائتميشدير. مولكدارلارين، محتكرلرين ياراتديقلاري آغير وضعييت نتيجسينده ئولكه ده آجليق باش ورميشدي. قادينلاردا كيشيلرله برابر مبارزه آپاريرديلار.بونا نمونه اولاراق “زينب پاشا” قياميندان آد آپارماق اولار.(3) قيد ائتمك لازيمدير كي،1903-جي ايلده تبريزده باش ورميش آجليق نتيجسينده شهر اهاليسينين 10% هلاك اولموشدور(4).
ظولمه قارشي آذربايجان و ئولكه نين ديگر ايالتلرينين ضياليلاري هر طرفلي مبارزه يه قالخميشلار.ئولكه نين اقتصادي- سياسي دورومو و دولت اداره ائتمه سيستمي ايله راضلاشمايانلار جمعييتده بير سيرا اصلاحاتلارين حياتا كئچيريلمه سيني طلب ائديرديلر. ملي بورژوازيا نماينده لري ،ضياليلار،اروپادا تحصيل آلانلار،ليبرال مولكدارلار،مترقي و دمكرات انسانلار ئولكه ده جدي صورتده دولت قورولوشونون،اداره ائتمه سيستمينين ديشيلمه سينين و ينيلشمه سينين طرفداري ايديلر.
تجدد ودمكراتيك فيكيرلرين يايلماسيندا ، سيد جمال الدين اسدآبادي، ميرزا ملكم خان،ميرزا عبدالرحيم طالبزاده،خيرالملك،ميرزا يوسف خان عتصا م ا لملك، حاجي زينا ل عابدين مراغه اي و باشقا ضياليلارين خدمتلري اهمييتلي درجه ده تاثيرلي اولموشدور(5). تجدد طرفدارلاري ،دمكرات مبارزلر هر چند ئولكه ده دولتچيليگين فورما باخيميندان ده يشيلمه سي طلبيني ائره ليه سور مه سه له رده ، دولت قورولوشونون مختليف فورمالاردا ديشيلمه سينين و يني لشمه سينين طرفداري كيمي چيخيش اديرديلر.
تهراندا عدالتخانا ناظرلييينين يارانماسيني طلب اديرديلر. مشروطه چيلرين تعضيقلري نتيجه سينده مظفرالدين شاه قاجار مجبورييت قاشيسيندا قالاراق عدالت خانا ناظرليينين يارانماسينا امر ورير.
شاهين امرينده بئله يازيلميشدير: تعجيلي اولاراق بوتون ممالك محروسه ده عدالت خانالار برقرار اولسون(6).
احمد كسروي يازيردي كي، عدالت خانا ديلنده بوگونكو” عدليه” نظرده توتولور(7).
مقصد اوندان عيارت ايدي كي، ئولكه ده اجتماعي عدالتسيزلين و انسان حقوقلارينين پوزولماسينين قارشيسي آلينسين.
ياريم مستملكه واورتا عصيرلر شرائطينده مطلق شاهليق اصول- اداره سي جمعيتين انكشافنين قارشيسني آليردي. اورتا عصيرلر مناسبتلرينين حاكيم الدوغو بير دورده،ئولكه نين اجتماعي-اقتصادي دوروموو صنايع باخيميندان استحصال مناسيتلرينين اولدوقجا ضعيف اولماسي مشروطه حركاتينين ئونونده گئده نلرين قارشيسيندا معين مانعلر ياراديردي.اونلار قيد اولونان شرائطه اساسا دولت-حكومت سيستمينين فورما ديشيلمه سيني نظره آلمادان مبارزه و سياسي ايستكلريني، دولت قورولوشوندا معين اداره ائتمه و اقتصادي اصلاحاتلارچئرچيوسينده طلب اديرديلر. يني فيكير طرفدارلاري ئوز ايستكلريني راديكال فورمادا ائره لي آپارا بيلمديكلرينين معين سببلري واريدي ؛
– ميلي بورژوازينين هر طرفلي انكشاف ائتمه مه سي ؛
– تجدد طرفدارلاري اچريسينده بعضي خانلارين و فئودالارين اولماسي؛
– تهران مشروطه حركاتينين رهبرلينين اكثر حيصه سينين ماسون جريانينا باغلي اولماسي و سائره.
بو كيمي عاميللر فورما و مضمون باخيميندان سياسي حاكمييتين ديشيلمه سي و دمكراتيانين هر طرفلي انكشافينين قارشيسيني آليردي.
مشروطه آناياساسي
1906-جي ايلده ايراندا باش وره ن سياسي حا ديثه لرين اساس مغزي ماهييت و مضمون اعتيباري ايله حكومت سيستمينين ينيلشمسيندن ن عبارت ايدي . مشروطه حركاتينين اساس وظيفه سي محض بونو هدف گوتورموشدور. ايراندا يني آناياسانين قبولونا قده ر مطلق شاهليق اداره ائتمه اوصولو حكم سوروردو. تاريخچيلرين آتاسي آدلانان مشهور تاريخچي هرودوت يازيردي كي، تا قديم ايللردن بري ايراندا هر زامان حكومت و دولت سيستمي بير نفرين(شاهين( وارليغيندا خلاصه لشيردي(8).
مشروطه حركاتينين باشلانغيجي قاجار سلاله سينين اوللرينه گئد يب چاتيردي. باشقا سوزله د ئسك،ئولكه ده آنا ياسانين قبولو و مللي شورا مجليسينين يارانماسينين مبارزه تاريخي ئوزون ايللردن بري دوام اديردي. بويازينين مقصدي مشروطه حركاتيني تاريخي باخيمدان آناليز ائتمك دئيل. مقصد مشروطه حركاتينين زيروه سي اولان آناياسايا حقوقي باخيمدان دقت يتيرمكدير.
1906-جي ايل آگوست آينين 5-ده مظفرالدين شاه آزاديخواهلار اردوسونون قارشيسيندا تسليم اولوب مشروطييت فرمانيني اعلان ادير.
ملي مجليسين آچيلماسي و ايران دولتچيليك تاريخينده ايلك دفعه اولاراق آناياسانين مذاكريه چيخاريلماسي « قانون » سوزونون اتوروشماسينين و رسميلشمه سينين تمل داشي ايدي.
19 آوگوست 1906-جي ايلده مجليسي شوراي ميللينين طنطعنه نلي صورتده آچيليشي اولموشدور. آناياسانين مذاكره سي آگوست آيندا باشلايب نهايت دكابر آينين 31-ده ميلي مجليس طرفيندن لايحه فورماسيندا حاظرلانميشدير.شاه آناياسانين لايحه سيني قبول اديب و تصديق له ير. بئله ليكله ايراندا مشروطه رژيمينين رسمي فورمادا اساسي قويولور .همن گون ايراندا مشروطييت دورونون باشلانغيجي « ملي» بايرام گونو كيمي قيد الونور.
آنا ياسانين مذاكرسي عرفه سينده مجلس طرفيندن بير سيرا ئونملي ايشلرده گورولموشدور:
– 1906-جي ايل سپتامبر9-دا« سئچگيلر» قانونو رسمآَ اعلان اولونموشدور;
– ملي مجلس دولت مستقليني قورويوب ساخلاماق نامينه روس انگيليسلرين بيرگه تكليف ائتديكلري 400 مين ليره ليك ياردمي( وامي) رد إدير;
– دكابر آينين25 –ده« مجلس » آدلي روزنامه ايشق ئوزو گوردو;
– نويابر آينين 27-ده « نداي وطن» (وطن هاراي) آدلي گونده ليك ايلك دفعه اولاراق درج اولونور.(9)
مشروطه انقلابينين نتيجه سينده يارانميش پارلامنت ايكي پالاتالي مجلسدن عبارت ايدي :
– مجلس شوراي ملي ;
– مجلس سنا ;
مشروطه آنا ياساسي و اونون حقوقي ده يه رلري
1906 آگوست آينين 19 مشروطه چيلرين مجادله سي نتيجه سينده ايران دولتچيليك تاريخينده ايلك دفعه مجلس شوراي ملينين رسمي صورتده آچيليشي اولموشدور.
مجلس ايلك قانون وريجي اورگان اولاراق بيرينجي ايش گونونده ن آنا ياسانين مذاكره سينه باشلاير.
آناياسا 6 حصه دن ، 51ماده دن و گئنيش بير علاوه دن عبارت ايدي . مشروطه آناياساسي دونيانين ديگر دمكراتيك ئولكلرينين آناياساسي كيمي دمكراتيك پرينسيپلر يازيليب و ترتيب اديلميشدير. تجدد طرفدارلاري فرانسه ليلرله و انگيليسلرله گئنيش علاقه لرينه باخماياراق ، ايران آناياساسينين يازيلماسينده بلژيك تجروبسيندن استفاده اتميشلر.
ايلك دفعه ايدي كي ، ايران ئولكه سي اهاليسينين سياسي-اجتماعي حقوقلارينين قورونماسينا يازيلي صورتده تظمينات وريليردي.
بيرينجي دفعه ايدي كي، ئولكه نين ديگر ايالتلريندن ده ضيالي و مبارز انسانلار ئولكه نين داخلي و خاريجي سياستينين معين لشمه سينده اشتراك ائتمك حقوقونا مالك اولوردولار.
بيرينجي مجلس نماينده لري 162 نفردن عبارت ايدي و هر بير دوره سي ايكي ايلليك ايدي.(10)
نماينده لرين سس ورمه حقوقي حاقيندا، آنا ياسانين 7-جي ماده سينده يازيلردي كي ، مذاكره لر باشلانان زامان نماينده لرين 3/2 و سس ورمه زاماني مجلسده اشتراك اده ن نماينده لرين ياريدان چوخونون سسي قبول اولونور. ايلك دفعه ايدي كي، ئولكه ده مطبوعات، سوز و فيكير آزادليغينا يازيلي فورمادا ضمانت وريليردي. دمكراتيك ده يرله ره حرمت علامتي اولاراق مجليسين اجلاسلاري آچيق صورتده كئچيريليردي. بوتون اجلاسلاردا مخبرلرو ديگر تاماشاچيلار مجليسين داخلي نطامنامه سينه اساسا اشتراك اده بيلرديلر.اجلاسلارين آچيق فورمادا كئچيريلمسيندن مقصد اوندان عبارت ايدي كي، هئچ نه ملتدن گيزلي قالماسين. مجليسده باش وره ن حاديثه لري مخبرلر آزاد شكيلده قلمه آلماق و ئوز قزه تلرينده درج ائتمك حقوقونا ماليك ايديلر.
آنا ياسانين 16-جي ماده سينده يازيليردي كي: دولته، سلطنته ، ايله جه ده بوتون ناظير ليكلره عايد اولان مسئله لر بوتولوكله مجليس طرفيندن مذاكره اولونوب ،لازمي قرارلار و قانونلار وريلمه ليدير.
مجلس قانون وريجي اورگان اولاراق ئولكه نين داخيلي سياستينه نظارتدن علاوه، خاريجي سياسته و
بين الخالق علاقه لره عايد اولان مناسبتلري ، مقاوله لري و مذاكره لري بلاواسطه ئوز نظارتي آلتيندا ساخلايردي. باشقا سوزله قانون وريجي اورگان اداره اديجي اورگانين فعالييتلريني ايزله يب ونظارت مسئوليتيني ئوز ئوزه رينه گوتورموشدور. لازيم اولدوقدا هر هانسي بير ناظير ملت نماينده لرينين قارشيسيندا ايظاحات ورمه لي ، اگر قانون پوزونتوسونا يول وريلميشسه مجلس شاه طرفيندن همن ناظيرين ئوز ايشينده ن كنارلانماسيني طلب اديردي . ئيري گلديكده همن ناظير محكمه يه ده جلب اولونا بيلردي.
انسان حقوقلارينين قورونماسينا گلديكده وطنداشلارين حقوقلاري هر طرفلي قورونوردي. آناياسانين 32-جي ماده سينده يازيليردي كي: وطنداشلار بوتون ساحه لرده شكايتلريني يازيلي فورمادا مجلسين دفتر خاناسينا تقديم اده بيلرلر.اونلارين شكايتلري مطلق جوابلانديرالاجاقدير.
يرلي حاكمييت اوگانلارينين يارانماسي و همن اورگانلارين ايشلرينه نظارت ئولكه ده تك باشينا اداره ائتمه سيستمينين قارشيسيني آليردي .
وطنداشلارين آزادليغينين قورويوجوسو كيمي چيخش اده ن مجلس قانون وريجي اورگان اولاراق حقوقي باخيميندان نورماتيو آكتلاري ترتيب اديب و قانونلاري تصديقليردي.
سنا مجلسي
سنا مجلسي 60 نفر نماينده دن عبارت ايدي. سنا مجلسينين اجلاسلاري ملي شورا مجلسينين اجلاسلاريندان سونرا كئچيليردي. مشروطييت آناياساسينين 44-جي ماده سينده يازيليردي كي: سنا مجلسينين نظامنامه سي ملي مجلس طرفيندن ترتيب اديليب و مذاكره اولونماليدير . بو مجلسه سئچيلن نماينده لر ، ئولكه نين تانينميش ضياليلاريندان اولماليديرلار. اونلاردان 30 نفري شاه طرفيندن ، 15 نفري تهراندان ، قالان 15نفري ايسه ديگر ايالت و ولايتلردن سئچيلملي ايدي.
سنا مجلسي و يا ناظرلر طرفيندن گورولن ايشلر ، ايره ليه سورولن فيكيرلر مطلق مجلسي شوراي ملي طرفيندن رسمي فورمادا مذاكره اولونوب شورا مجلسينين مطلق سسيني قازانديقدان سونرا اجرا اولونوردي.
ملي شورا مجلسينين مختار حقوقو وار ايدي كي ، سنا مجلسينين ملاحظه لريني رد و يا قبول ائتسين . آمما بودا نظره آلينمالي ايدي كي ،سنا مجلسي هر زامان شاهين طرفداري كيمي چيخيش اديردي . مشروطه آناياساسينين 47-جي ماده سينده يازيليردي كي: اگر سنا مجلسي تشكيل تاپمازسا ، ملي مجلسده مذاكره اولونان موضولارنهايت شاهين راضيليغي آلينديغدان سونرا اجرا اولونا بيلردي.(11)
شاه هر هيكي مجلسي و يا لازيم گلديكده هر بيريني آيري-آيريليغدا لغو اده بيلردي. دمكراتيك حقوقلار باخيميندان مشروطه آناياساسينين چاتيشمايان جهتلريندن بيريسي محض همن 48-جي ماده ايدي.
مشروطه حركاتينين زيروه سي اولان آنا ياسانين دمكراتيك اساس حصصه اوندان عبارت ايدي كي، ئولكه ني مركزلشلميش اداره ائتمه قورولوشوندان مركزلشديريلمه ميش دولت قورولوشو فورماسينا چئويرسين. يرلي حاكمييت اورگانلارينين يارانماسي همن اداره ائتمه اوصولونون اساسيني تشكيل اديردي. آناياسانين علاوه سينين (متممينين) 29-جي ماده سينده يازيليردي كي : ممالك محروسه نين تركيبينده يارانميش ايالتلرين و ولايتلرين منفعتلريني همن منطقه لرين ايالت و ولايت انجمنلري طرفيندن قانون فورماسيندا ئوز عكسيني تاپماليدير.(12)
مشروطه حركاتيينين زيروه سي اولان آناياساسينين دمكراتيك ئوزه لييده ايله همن ايالت و ولايت انجمنلري تشكيل اديردي . مشروطه فرماني اساسيندا ئولكنين اراضي- اداره ائتمه قورولوشوآشاغيداكي ايالتلر و ولايتلردن عبارت ايدي :
ايالتلر : 1- آذربايجان ؛ 2- خليج عجم ؛ 3- خراسان و سيستان ؛ 4- كرمان و بلوچستان .
ولايتلر : 1- گيلان ؛ مازندران ؛ كردستان ؛ لرستان ؛ خوزستان ؛ عراق عجم ؛ استر آباد ؛ زنجان، كرمانشاهان؛ همدان ؛ اصفهان ؛ يزد و داراخلافه تهران .
آناياسانين علاوه حصصه صينين 2-جي ماده سينده ايالت و ولايت انجمنلرينين ايضاحاتي بئله وريلميشدير.
ايالت – ئولكه نين معين بير حيصصه صي دير. ايالتلرين مركزي حكومتلري وارديرو همن حكومتين حاكمي والي آدلانير.
ولايت – ئولكنين معين بير حيصصه صي دير. معين شهرلر و اونلارين اطرافينداكي قصبه لره شاميلدير. همن شهرلرين حاكملري واردير. ولايت ممكوندور كي نظرده توتولان ايالتين و يا ئولكه پايتختينين نظارتي آلتيندا اولسون .
ايالت و ولايت انجمنلري ئولكه دولتچيليك تاريخينده ايلك دفعه ايدي كي،يرلي حاكمييت اورگانلارينين اساسيني ياراديردي. انجمنلرين اساس مقصدي ئوزونو ادره ائتمه دن عبارت ايدي. دئمك اولار كي، انجمنلر هر بير ايالتده همن ايالتين پارلامنت رولونو اوينايردي.
آرديجيليقلا قيد اولونماليدير كي، مشروطه حركاتينين ئوزه يني تشكيل اده ن انجمنلرمجلسين آذربايجاندان اولان نماينده لرين تكليفي و تاكيدي ايله حياتا كئچيريلميشدي . استبداد طرفدارلاري آچيقجاسينا انجمنلرين عليهينه چيخيش اديرديلر. نهايت كي تبريز انجمني تهرانا تلگرام گوندريب و آذربايجان نمايندلريندن
استه ير كي : اگر تهران انجمن قانونون عليهينه چيخيرسا سيزلر تبريزه قايدين ، بيز ئوزوموز اونو اجرا اده ريك. بئله جدي اولتيماتوم دان سونرا مجلس آذربايجان نمايندلرينين دمكراتيك طلبلريني قانون فورماسيندا آناياسايا علاوه اولاراق آرتيرير. تهران مشروطه حركاتي ايله تبريز مشروطه حركاتينين ماهييت اعتيباري ايله اساس فرقي ايله بوندان عبارت ايدي.
جانسيز مشروطه حركاتيني جانلاديران آذربايجانين ايره ليه سوردويو ايالت و ولايت انجمنلري( يرلي حاكمييت اورگانلاري) اولموشدور. مركزلشديريلمه ميش دولت قورولوشو فورماسينين اساسيني دا همن انجمنلر تشكيل اديردي.
بير سوزله ، 1906-جي ايل مشروطه حركاتينين اساس محصولو آشاغيداكيلاردان عبارت ايدي :
– ايران ئولكه سيني مطلق پادشاهليق حكومت سيستمسندن آناياسالي سلطنت اداره ائتمه سيستمينه
كئچمه سي؛
– يرلي حاكمييت اورگانلارينين يارانماسي؛
– آناياسا قانونلاري اساسيندا قانونوريجي، اجرا اديجي و محكمه اورگانلارينين آيريجا فعاليت
گوسترمه لري ؛
– وطنداشلارين قانون قارشيسيندا برابر حقوقلو اولمالاري؛
– عدالت خانالارين يارانماسي؛
– مطبوعات، سوز و فيكير آزادليغينا تاميناتين وريلمه سي و سائره …
يوخاريدا سادالاناننار مشروطه حركاتينين ايراندا دولت و حقوق سيستمينده عمله گتيرديكلري اساس ده يشيكليكلرده دير.
قيد اتديميز نائليتلري نظره آلماقلا ياناشي ، تاسفله ورغولاليك كي، مشروطه انقلابي الده اتميش اوغورلاري قورويوب ساخلايا بيلمه ميشدير.
استبداد ئوز حاكمييت منفعتلريني الدن ورمك استميردي. اودور كي، ارتجاع داخيلي و خاريجي قوه لردن هر طرفلي استفاده اديب مشروطه حركاتينين دمكراتيك ده يرلرينين عليهينه متشكل فورمادا مبارزه آپاريردي. مشروطه حركاتينين دمكراتيك استكلرينين اوغورلا سونا چاتماماسينين و محكملنمه مسينين معين داخلي وخارجي سببلري ايله ياناشي سوبيكتيو و اوبيكتيو علتلري ده واريدي.
او جمله دن :
– مشروطه حركاتينين طلبلرينده دولت قورولوشو فورماسينين ديشيكلي ايله ياناشي دولت فورماسينين ديشيلمه سينين ايره ليه سورولمه مه سي؛
– تهراندا و تبريزده باش وره ن مشروطه حركاتينين اساس دمكراتيك ماهييتينين فرقلي اولماسي؛
– تهران مشروطه حركاتينين داخيلينده محافظه كار قوه لرين موجود لوغو؛
– خاريجي دولتلرين ، او جمله دن روس و انگليس لرين خيانتلري و تجاوزلري…
بو كيمي عاميللر مشروطه حركاتينين تام غلبه چالماماسينين اساس سببلريندن سا يلا بيلر.
آما بوتون بونلارا باخماياراق قطعييتله دئمك اولار كي، 1906-جي ايلده باش ورميش دمكراتيك مشروطه حركاتي ايران دولتچيلييك تاريخينده مترقي، دمكراتيك جريان و پارلاق صحيفه اولاراق قالاجاقدير.
* * *
ادبيات :
1- م عافيت سردار ملي ستارخان 1968.ص 25
2- ا. كسروي تاريخ مشروطه ايران 1319 (بيرينجي جلد) ص 73؛
3- ” ” ” ” ” 1322(ايكينجي جلي)ض 86 ؛
4- دكتر م.ملك زاده تاريخ مشروطه ايران تهران 1329 . IIIجلد .ص 122
5- ” ” ” ” ” ” ” ” ” . IV جلد ص 173
6- هرودتين III كيتابي (80-86)جي بندلر
7- ادوارد براون مطبوعات و ادبيات ايران در دوره مشروطيت ( ترجمه محمد عباسي) تهران 1958 . ص 49
8- ” ” ” ” ” ” II حصصه، بحث در سيستم حكومت ايران تهران . 1958 .ص 77
9- ك.ب. بهزاد تبريزي، قيام آذربايجان در انقلاب مشروطه ايران،تهران 1955.ص92
10- م.س.ايوانوف 1905-1911 انقلاب ايران
11- قانون اساسي و متمم آن به انضمام فرمان مشروطيت
12- ” ” ” ” به انضمام فرمان مشروطيت
13- مشروطه آناياساسينين علاوه سي.
پرويز ( اورومچي )
05/04/20