مژگان صیامی
آغ آپباق، گؤزه‌ل، نازلی – دوزلو، سس‌سیز سایقیلی «سونا» خانیم! قوجاقلاردان دوشموردو. . . او قده‌ر تربیه‌لی- سئویملی و او عائله‌ده ده یئری وار ایدی کی سون بئشیک سایاغی اونو عزیزله‌ییردیلر. گؤزلری بال رنگینده، ساچ‌لاری پامبیق کیمی، جانی هر زمان تر – تمیز. . . او ائوده دوغولموشدو.
هر شئیی اؤزه‌ل و آیریجا آلینمیشدی. بالاجا بیر رنگلی بزکلی کومه‌سی، یاتاق یئری، قاب – قاشیقی، آیین اویونو، توره‌لی اویونجاق‌لاری و. . .
پاپیون‌لاری آرا بیر دئییشیلیردی، آمما قیرمیزی اطلسی پاپیونی چوخ واقت بوینوندا گؤزه ده‌ییردی. سئوه – سئوه ائله بویونا اوخشاییردیلار، قونوم قونشونون بالالاری بو شانس‌لی دوم آغ پیشیگه قیسقانیردی‌لار! اودا اؤزونو نئجه ازدیرمه‌یینی یاخشی بیلیردی. عائله‌نین کولتورونو آنلاییب، یول -رویه اویره‌نمیش، سهوی چوخ آز اولوردو. . .
یئنه تاپیلدی!! آرالیق – آرسیز – آریق ائرکک پیشیک. . . توستو رنگینده گؤزلری، پیر – پیزاقلی توک، چیرکلی جان و آیاقی‌نین بیری ایسه آخساییردی. بیر نئچه گون اولاردی، گلیب بو ائوین هره‌سینده چابالاییب، میریلدایاراق، سونانی گزیردی، بلکی ده چاغیریردی. . .
بو چولاق ائرکک پیشیک آنجاق بورادان اوزاقلاشمیردی، سوپورگه سایاغی بیغ‌لاری داها دلی دولو گؤرسه‌نیردی.
سونا چوخ سایمیردی، هنده‌ورینه دولانمیردی، آمما سایمامازلیق دا دئمک اولمازدی. . . بیر گؤزو ائو‌ییه‌سینده، اوشاقلاردا، بیر گؤزوده چولاق ائرکک ده قالمیشدی. نه ائده‌جه‌یینی بیلمیردی، آنجاق داورانیشیندان اونا ساری گئتمه‌یه ماراقلی ایدی.
نه قده‌ر چالیشیردی حیه‌ته یول تاپسین، اولموردو. دووار چوخ اوزون، قیقاجی، دمیر نرده‌لر اوخ شکلینده، یان با یان دایانمیش، یولونو دوتموشدو. آتلانیردی! قالخیردی، ائنیردی، قاچیب – دایانیردی، عصبلشیردی، میریلتیسی اوجالیردی، هلاک اولوردو. . . آنجاق هر یئری ایزله‌یه‌رک، یول آختاریردی.
سونانین قوخوسو، ائله دولموشدو بوتون وجودونا، قرارسیز ایدی. . . بورنونون پنه‌لری آچیلمیشدی، آیاغینی سورویه‌رک آنجاق بیر دیقه دینج قالمیردی، دار – دودوک ده اولسایدی، بیر (یول) دالی سوره ایدی! بور – بوجاغا گیریب چیخیردی، هره‌نین انین – اوزونون، یئنه یوز دؤنه گونده قاچیردی. . .
بئله کی گؤرونوردو سونادان کئچه‌نی دئییلدی.
سونا گیزلی شکیلده باخیب، قاییدیردی. دایانیردی، بیر ایکی آددیم دووارا ساری گئدیب، پنجره‌دن کولگه گوره‌رک قاییدیردی. آرا بیر یوخو دوتوب ساعات لارلا هره‌ده یاتیردی، ائو‌ییه‌سی اونو بو ائوه آلیشدیرماماق ایچین هئچ نه وئرمه‌ییب، قووالاییردیلار.
سسی گلجه‌یین، ندنسه سونانین اوره‌یی چیرپینتیا دوشوردو. نه حیه‌ته چیخا بیلیردی، نه باشقا بیر ایش گؤره بیلیردی. سس‌سیز – سمیرسیز، ال آیاغین گؤزه‌ل ایپک کیمی‌توک‌لرینین آلتینا‌ییغیب ائیلشیردی.
آغیز – بورنونون سویو دئییب – قاریشمیشدی بیر بیرینه، جانی زیغلی، گؤزونه داش دئیمیش کیمی‌قانلی، توز – تورپاق و یارالی ایدی. داها دؤزومونو الدن وئرن کیمی، چابالاییردی، باغیریردی، بوغازیندان غیژیلتی سسی گلیردی، سانکی بوغولوردو!
سونا دایانا بیلمه‌دی، آستا – آستا حیه‌ته ساری، گؤزلری بیر – بیرینه ساتاشدی. دووارا یاخین، کولگه‌یه ساری گئتدی، باشینی قالدیریب یاواشجا هره‌یه باخیردی. اؤز الینده دئییلدی، گؤز‌لرینی پنجره‌لردن، حیه‌تدن، دوواردان بئله چکیردی هره‌یه. . . پاپیونون شکیلی دوشموشدو شوشه‌یه، ایشیلداییردی. اؤزو – اؤزوندن چوخ خوشلانیردی! ایسته‌میردی بو ائوی الدن وئرسین، ده‌یرلی اولاجاق‌لارینی، یئر – یوردونو، بو گؤزه‌ل عائله‌نین محبت‌لرینی… امک ایتیرمک ایسته‌میردی، بیریانداندا قورخوردو، بیلمیردی اوره‌یی یانیر یوخسا ایسته‌ییر. . .
اهمال – اهمال آددیملایاراق، بیر گؤزو ائوده، بیر گؤزو اوندا، دووارا یاخینلاشیردی.
اوره‌یی اوزولدو سونانین! دیکسیندی! ال آیاغین ایتیردی! ائرکک پیشیک اؤزونو آتمیشدی حیه‌ته. نئجه آتلاندیغینی – گلدیینی بیلمه‌دی، آمما گؤردوکی سورونه‌رک، آغاجین آلتینا گیردی!
ائودن سس گلیردی، سانکی سونانی چاغیریردیلار!
اسیردی، دهشتدن گؤزلری ایریلمیشدی، ائرکه‌یین میریلتیسی دایانمیردی، گؤزون تیکمیشدی دوز سونانین گؤز‌لرینه، ایسته‌ییردی یاخینلاشا، سونا قاچیب، سؤیود آغاجی‌نین کناریندا گیزلندی، گلدی! تاپدی! سونا راحاتسیزجا گیجه‌لیردی، کردی‌نین اورتاسینا هئچ گیرمزدی، هوولوندن کردی‌دن بئله، قیزیل گول‌لرین دالیندا گیزلندی، یئنه گلدی! بو دؤنه توخونماق ایسته‌ییردی، سونا قاچدی – او قاچدی. اوره‌یی آز قالیردی آغزیندان چیخسین. . . قاپی‌نین آلتیندان اوزولدو کوچه‌یه! ائله او آن، دؤنوب باشینی سالیب حیه‌ته ، سونانی اؤزونه ساری چکیردی، امر ائده‌جک کیمی، غورولداییردی. . . سونا همی‌اوره‌یی اوزولوب قورخوب، همی‌گئری قاییدیب، ائوه ساری گئده بیلمیردی.
اونا عادی اولاراق، قاپی نین او سووشولماز یئریندن چیخمیشدی. آمما سونا ایچین چوخ چتین ایدی! باشینی کوچه‌یه چیخارمیشدی، آمما جانینی قوتارا بیلمیردی، ازیلیب داغیلیب، گوج ایله آنجاق اودا چیخدی.
ائودن جییه‌ر قوخوسو گلیردی، سونانی گزیردیلر، پیله کاندان آیاق سسی گلدی. . .
سونا چیخدی!
بیرینجی دؤنه ایدی اذن‌سیز و یالنیزجا چؤله چیخیردی، چیخدی! پاپیونو ایلیشدی قاپی‌نین قیفیللانان یئرینه، دارا چکیلن کیمی‌دوگونو دارالیب، بوغازینی‌سیخدی!
دوشدو چولاق ائرکه‌یین دالی سوره، او قاچیردی، بودا تؤشگونو درمه‌دن، ترله‌ییب، تیتره‌یه‌رک آرخاسیندان گئدیردی.
بیلمیردی‌هایانا، آنجاق اونونلا برابر گئتمک ایسته‌ییردی. او تله‌سیک، کوچه به کوچه، دام – دووارلاردان، قاپی باجادان، ائنیش – یوخوشدان، دوشوب چیخاراق قاچیب و بونودا دالی سوره قاچیریردی. خارابا قالمیش بیر یئره چاتدیلار، در – دمیر، آهن، آت آشغال، لئش – لوش ایچینده، گؤز‌لردن اوزاق، بوجاقدا اوچورولموش بیر یئرده سیغیندیلار. هئچ دؤزمه‌دن، باخمادان، دایانمادان، جومدو سونانین اوسته. . .
چیرپینیردی، آتلانیب – دوشوردو، عجایب سس‌لر بوغازیندان چیخیردی! سونانین نفسی تیخجینمیشدی، قاچماق ایسته‌ییردی، آمانی قیریلمیشدی، بوغولوردو! بیر نئچه آن جان‌لاری قیزیشدی. . . . .
سونرا نریلتیسی کسیلدی! سوسوب، اورادان اوزولوب یولا دوشدو، اوزاقلاشدی! سونا سیزیلداییردی، یورغون – آرغین زیریلداییردی، مله‌ییردی، پاپیونو آچیلمیشدی. . .
اوز گؤزو چیرکلی، جانی ازیلمیش، آج – سوسوز، ییخیلیب قالمیشدی.هاوا قارالیردی، چاره‌سیزجه ملیل – معلطل قالمیشدی. دونوخموشدو خارابالیغا! هئچ بیر ده‌یرلی شئی گؤزونه دئیمیردی، نه قده‌ر گؤزو گزدی، اونو تاپابیلمه‌دی، گورمه‌دی، ائشیتمه‌دی. او قده‌ر قاچمیشدی، ائنیب – قالخیب، جیزیلیب، دیدیلمیشدی، اینجیمیشدی، دیدرگین حال دا یوخوسو دوتدو! یاتدی. . .
صوبح آچیلارکن ائرته‌دن گؤزونو آچدی.
هر شئی فرق‌لی، هر شئی غریب، ائو یوخ، حیات یوخ، یاشام یوخ، نه یئمک – نه ایچمک، نه اؤزونو ازدیرمک، قوجاقلاردا نازلانیب اویناماق، نه چیچک نه آغاج نه حاووز! هئچ نه. . . گؤز‌لرینی یوموب یئنی‌دن آچدی، یوخو گؤروردو؟ یوخ. . . یادینا بیر شئی‌لر دوشدو.
دوردو یاواش – یاواش آددیم‌لارینی آتیب یولا دوشدو! ائوه قاییتماق ایسته‌ییردی. تانینماز بیلینمز کوچه – باجالاردان باش چیخاریردی. اوخشادیب، کوچه‌لره دؤنوردو، بلکی ائوی تاپسین دئیه! داها آرتیق تورا دوشوردو، اوشاقلار دوتماق ایسته‌ییردی، داش آتیب، دالی سوره قاچیردیلار، جانین گؤتوروب قوتاریردی. او قده‌ر سوروندو،ها جان آتدی بیر شئی تاپیب یئسین، اولمادی. ایسته‌دی او بیری آرالیق پیشیک‌لر کیمی‌آرسیز یاشاسین، شیر – شیندیر ایچره زیبیله قاریشمیش، دری – بوغاز گؤردو، یئمک ایسته‌ییردی، یئیه بیلمه‌دی! حالی قاریشدی، اوره‌یی بولاندی، نه قده‌ر چالیشدی آغزی آچیلمادی! آخداردیقجا ایرنج شئی‌لره راست گلیردی! آچیق قاپی‌لاردان گیرمک ایسته‌ییردی، قووردولار، قویموردولار! بوتون فیکری ائوده قالمیشدی. هر جوره ایدی تاپماق ایسته‌ییردی، هر شئیی الدن وئرمیشدی. . . یئنیجه اله گتیریب، قدرینی بیلمک ایسته‌ییردی، آمما آخداردیقجا سانکی ائودن اوزاق دوشوردو، هئچ بیر خیاوان – کوچه – دام دووار اولدوغو ائوه بنزه‌میردی، آدام‌لار، اشیاء‌لار، آرابالار. . . هر شئی غریب، هر شئی غریب!
اوستو باشینی توز – تورپاق بوروموشدو! الی هئچ بیر یئره بند دئییلدی، دیل – دوداغی قوروموشدو، سانکی گؤز‌لرینین اؤنونه دومان چکیلمیشدی، آیدینجا بیر یئری گؤرموردو، ایستی – سویوخ، ستلجم ائله‌میشدی، پاپیونون ایزی قالمیشدی، آغ – آپباق جانی کول رنگینه دؤنموشدو، کول اولموشدو!
سورونه – سورونه، امین اولاراق، اؤزونو سؤنموش بیر ماشینا یئتیردی، سویوخدان گیریب تیه‌رین یانیندا یئرلشدی. . .
صوبح، سونانین قانلی تیکه – پاراسی داغیلمیشدی خیاوانا. . .
ماشینین تیه‌رینین ایزی، هله ده کوره‌یینده ایدی!
چولاق ائرکک، باشقا بیر (سونا) دالی سوره قاچیردی. . .