«فارس» خبر آژانسی‌نین یایدیغی خبره استنادا، آذربایجانین تانینمیش شاعری و یادداشتلاردا قالان «آیریلیق» ماهنیسی‌نین موللیفی رجب ابراهیمی(فرهاد) اوزون مدت خسته‌لیکدن سونرا بهمن آیی‌نین ۲۰نجی گونو اردبیل شهرینده ابدی‌لیک سوسموشدور.
رجب ابراهیمی(فرهاد) ۱۳۱۴نجی ایلین آبان آییندا اردبیل ولایتی‌نین یورتچو ناحیه‌سینده کورعباسلو کندینده دونیایا گؤز آچمیش، عؤمرونون اوزون ایللرینی تهراندا، سون ایللر ایسه اردبیلده یاشامیشدیر. فرهادا بؤیوک شؤهرت گتیرن اونون «آیریلیق» عنوانلی شعری اولموشدور. بو شعر ۱۳۳۵نجی ایل یارانیب و گؤرکملی آذربایجان بسته‌کاری اوستاد علی سلیمی‌بو شعرین اوستونده ماهنی بستله‌میشدیر. ماهنینی ایلک دفعه تبریز رادیوسوندا «وارتوش» خانیم، سونرالار ایسه رشید بهبودف، یعقوب ظروفچی، باریش مانچو، امیل ساین، لطفیار ایمانوف، داریوش، گوگوش، منصور، جم کاراجا، کورای آوجی، ماحسون قیرمیزی گول و بیر چوخ خواننده‌لر ایفا ائتمیشدیر. «آیریلیق» ماهنیسینا دونیا شؤهرتی قازاندیران رشید بهبودوفون ایفاسی اولموشدور.
رجب ابراهیمی(فرهاد)ین ادبی یارادیجیلیغی داها آرتیق آنا دیلینده اولموشدور. اونون شعرلرینین بیر حصه‌سینی احتوا ائدن «آیریلیق» عنوانلی شعر مجموعه‌سی ۱۳۸۸نجی ایل «یعقوب بهادر» طرفیندن ساهمانلانیب و «سعید موغانلی»نین تشبثی ایله «پینار» انتشاراتی واسطه‌سیله ۲۰۰۰ نوسخه‌ده یاییلمیشدیر.
«ایشیق»- آذربایجان ادبیات و اینجه صنعت سایتی اونودولماز آذربایجان شاعری و اجتماعی شخصیتی رجب ابراهیمی(فرهاد)ین آغیر ایتگیسینی آذربایجان خالقینا، ادبی- مدنی جمعیتیمیزه، شاعرین حؤرمتلی عائله‌سی و تانیشلارینا تسلیت دئییر و اوستادین اونودولماز خاطره‌سینی عزیزله‌ییر.
«ایشیق»- آذربایجان ادبیات و اینجه صنعت سایتی
۲۰/۱۱/۱۳۹۷
«آیریلیق ماهنیسی»
فیکریندن گئجه‌لر یاتا بیلمیرم
بو فیکری باشیمدان آتا بیلمیرم
نئیله‌ییم کی سنه چاتا بیلمیرم
آیریلیق، آیریلیق، آمان آیریلیق
هر بیر درددن اولار یامان آیریلیق
اوزوندور هیجرین‌دن قارا گئجه‌لر
بیلمیرم من گئدیم‌هارا گئجه‌لر
ووروبدور قلبیمه یارا گئجه‌لر
آیریلیق، آیریلیق، آمان آیریلیق
هر بیر درددن اولار یامان آیریلیق
یادیما دوشنده آلا گوزلرین
گویده اولدوزلاردان آلام خبرین
نئیله‌ییم کسیبدیر مندن نظرین
آیریلیق، آیریلیق، آمان آیریلیق
هر بیر درددن اولار یامان آیریلیق
آیریلیق دردینی چکمه‌ین بیلمز
یاردان آیری دوشن گوز یاشین سیلمز
دئییرلر اینتظار خسته‌سی اؤلمز
آیریلیق، آیریلیق، آمان آیریلیق
هر بیر درددن اولار یامان آیریلیق
نئجه کی ائلیمدن آیری دوشندن
سورار بیربیرینی گوروب بیلندن
حسرتله سیزلار یار داییم بو غمدن
آیریلیق، آیریلیق، آمان آیریلیق
هر بیر درددن اولار یامان آیریلیق
ایللردی اوزاغام آرخام ائلیمدن
بلبلم دوشموشم آیری گولوم‌دن
جورایله آییریب شیرین دیلیم‌دن
آیریلیق، آیریلیق، آمان آیریلیق
هر بیر درددن اولار یامان آیریلیق
اولوبدور بیگانه یاریم_ یولداشیم
غریبه ساییلیر سئوگیم – سیرداشیم
بو جاوان چاغیمدا آغاردیب باشیم
آیریلیق، آیریلیق، آمان آیریلیق
هر بیر درددن اولار یامان آیریلیق
منی آغلاداندان گولوش ایسته‌رم
آیری دوشنیمله گوروش ایسته‌رم
حصاری ییخماغا یوروش ایسته‌رم
آیریلیق، آیریلیق، آمان آیریلیق
هر بیر درددن اولار یامان آیریلیق
سئوگیلیک اولوبدور شانی فرهادین
سئوگیسی‌هاردادیر،هانی فرهادین
دییه‌ره‌ک چیخاجاق جانی فرهادین
آیریلیق، آیریلیق، آمان آیریلیق
هر بیر درد دن اولار یامان آیریلیق