-2019جو ایل نویابرین 30-دا صیاد داسی یولداشین اؤلوم خبری بیزی ده دریندن سارسیتدی، بو مناسبتله مرحومون عائله عضو‌لرینه درین حوزنله باشساغلیغی وئره‌رک اؤزوموزو بو غم-کدرده شریک ساییریق.
یولداش صیااد داسی آغامی اوغلو 1933-جو ایلده آذربایجانین صفا‌لی گوشه‌لریندن بیری اولان لنکران شهرینده دونیایا گؤز آچمیش‌دیر. لاکین حادثه‌لرین گئدیشاتی چوخ تئز 6 نفرلیک عائله‌نین لنکرانی ترک ائده‌رک باکیا کؤچمه‌لرینی ضروری ائتدی.
اقتصادی باخیمدان باکیدا اؤزونو تأمین ائتمه‌یه یئنیجه ایمکان تاپان آغامی عائله‌سی 1938-جی ایلده اؤز ایستی اوجاغینی ترک ائده‌رک ایرانا مهاجرت ائتمه‌یه مجبور ائدیلدی. بو دفعه بابا یوردو اولان نمین شهرینین پیله چای ماحالی آغامی‌نین عائله‌سی‌نین مسکن سالدیغی مکانا چئوریلدی.
طبیعی کی، رضا شاه دیکتاتوراسی‌نین اؤلکه‌ده یاراتدیغی آغیر اقتصادی و سیاسی شرایط آغامینی ده قورتولوش اوغروندا مبارزه آپاران آزادلیق‌سئورلرین سیرا‌لارینا قوشدو. آغامی جرگه‌لرینه قوشولدوغو گیزلی تشکیلاتا اردبیل شهر کمیته‌سی رهبرلیک ائدیردی. بو سببدن همین دؤورده فعالیته باشلایان جاوان‌لار تشکیلاتی‌نین فعال عضو‌لرین‌دن بیری ده صیاد یولداش اولدو. سکیز ایل بابا یوردوندا یاشاییب و مبارزه‌یه قوشولان صیادین آرزوسو حقیقته چئوریله‌رک س،ج،پیشهوری‌نین رهبرلیگی ایله آذربایجاندا میللی حکومت قورولدو و بیر ایل یاشادی. لاکین تأسف‌لر اولسون خاین ایران مرکزی دؤولت و اونون حمایه‌دارلاری واسطه‌سی ایله 1946-جی ایل آذر آیی‌نین 21-ده آذربایجان میللی حکومتی مغلوب اولدو. بو حکومتین سوقوطون‌دان سونرا. صیاد داسی یولداش عائله‌سی ایله بابا یوردونو ترک ائتمه‌یه مجبور اولدو. بو عائله سرحددی کئچه‌رک او دؤورورکو سووئت آدربایجانین شکی شهرینده ساکین اولدو.
شکیده فعالیته باشلایان آذربایجان دئموکرات فیرقه‌سی‌نین نزدینده تشکیل ائدیلن جاوان‌لار تشکیلاتینا باشچی‌لیق ائتمک صیاد یولداشا اعتبار ائدیله‌رک، رهبرلیگی اونا تاپشیریلدی.
1962-جی ایلده آذربایجان پولیتئکنیک اینستیتوتونون صنایع، ماشین و آپارات‌لاری عذره فاکولته‌سینی بیتیره‌رک مهندیس‌لیک پئشه‌سینه ییه‌لنیر. اوزون ایللر یونگول صنایع ناظرلیگی‌نین موختلیف فابریک‌لرینده چالیشیر. بؤلمه رئیسی وظیفه‌سینه قدر یوکسلیر. ایشلدیگی مدتده صنایعنین مختلف ساحه‌لرینده یئنی اخترا‌علار و استحصالین خئیرینه ثمرهلشدیریجی تکلیف‌لر ایره‌لی سورور. بو اخترا‌علارینا گؤره دفعه‌لرله ناظیرلیگین فخری فرمان‌لاری ایله تلطیف ائدیلیر. او، استحصاالات‌دان بیر امک وئترانی کیمی آیریلیر.
یولداش صیاد داسی امک فعالیتیندن علاوه همیشه بیر سیاستچی ومبارز بیر شخصیت اولا‌راق، آدف و ایرانلی سیاسی مهاجرلر جمعیتی‌نین رهبر اورقان‌لاریندا یورولما‌دان چالیشمیش.
یولداش صیاد داسی گؤزل تشکیلاتچی اولموش، اونون اولدوغو یئرده مطلق آذربایجانیمیزین نئجه آزاد اولماسی دائما مباحصه پرئدمئتی اولموش.
او، او تایلی-بو تایلی آذربایجانین چیچکلنمه‌سینی آرزوسو ایله گؤردوک‌لرینی، ائشیتدیکلرینی و بیلدیکلرینی قلمه آلا‌راق، اوچ جیلده قالین حجملی خاطره معموعارینی خالقیمیز اوچون اؤزوندن ابدی یادیگار قویموشدور
یولداش صیاد داسی عؤمرون سون آنینا قدر وطنی‌نین آزادلیغی اوچون سارسیلما‌دان مبارزه‌سینی داوام ائتدیرمیشدیر. لاکین طبیعتین قانونودور، هر بیر اینسان حیاتا گلیر، چالیشیر و بیر گون ده حیاتی سونا یئتیر. صیاد یولداش دا استثنا‌سیز بو قانونا تابع ایدی و بو اوزدن ده 2019-جوو ایل نؤیابرین 30-دا حیاتا گؤز اوما‌راق بو دونیا‌دان کؤچدو. رو هو شاد اولسون.
آذربایجان دئموکرات فیرقه‌سی بیر داها صیاد یولداشین دونیا‌دان کؤچمه‌سی مناسبتی ایله بوتون فیرقه عضو‌لرینه و خصوصی ایله مرحومون عائله عضو‌لرینه درین حوزنله باشساغلیغی وئریر.
آذربایجان دئموکرات فیرقه سی مرکزی کمیته سی
بیر نویابر 2019