عزیز وطنداش‌لار!
آذربایجان دئموکرات فیرقه‌سی‌نین عضو و طرفدارلاری!
داخیلی و خاریجی خبر آگئنت‌لیک‌لری‌نین وئردیکلری خبره اساساً تجاووکار ائرمنیستانین سلاحلی قوه‌لری طرفیندن “توووز” منطقه‌سی ایستیقامتینده آذربایجان رئسپوبلیکاسی اراضیسی یئنی‌دن تجاووزه معروض قالارق، آتشکس رئژیمی پوزولدو. آذربایجان اوردوسو قطعیتله بو تجاووزون قارشیسی آلدی. لاکین هله ده پراکنده شکیلده آتیشما داوام ائتمکده‌دیر.
بو ووروشمادا هر ایکی طرفدن اؤلن و یارا‌لانانلار وار. آذربایجانلی قارداش‌لاریمیزی‌دان یاش‌لی بیر مولکی وطنداش، بیر نئچه عسگر، ایکی سرگرد، بیر سرهنگ و بیر ژنرال- بیرلیکده 12 نفر شهید ولدولار.
بیلدیگینیز کیمی آذربایجان اراضیسی‌نین آیریلماز حیسه‌سی اولان داغلیق قاراباغ موختار ویلایتی اوزرینده آذربایجان رئسپوبلیکاسی ایله ائرمنیستن آراسیندا گئدن بو مناقیشه سووئت اتفاقی‌نین داغیلماسی ایللرینه تصادف ائدیر.
ائرمنیستانین بو تجاووزو سووئت اتفاقی‌نین داغیلماسی ایله باشلاندی، ایکی طرف آراسیندا بو مناقیشه چوخ سرعتله گئنیش بیر محاربه‌یه چئوریلدی. ائرمنیستان دؤولتی بو تجاووزو گئرچکلش‌دیرمک مقصدینی اؤنجه‌دن حاضرلادیغی اوچون سووئت اتفاقی‌نین داغیلماسی عرفه‌سینده یارانان خاووسدان(هرج-مرجدن) بهره‌لنه‌رک، یعنی آذربایجان دؤولتی‌نین مستقیللیگی دؤورونده گؤزلنیلمه‌دن اؤز شدتلی هجومو نتیجه‌سینده آذربایجان رئسپوبلیکاسی‌نین 20 فاییز تورپاغینی اشغال ائتدی. تجاووزکار ائرمنی سلاحلی بیرلشمه‌لری اشغال اولونموش منطقه‌لرین ساکینلرینی اؤز دوغما آتا-بابا یوردلاریندان قووا‌راق دیدرگین سالدی. ائرمنیستانین بو وحشی تجاووزو نتیجه‌سینده میلرله مولکی، او جمله‌دن قادین- کیشی، قوجا- جاوان و کورپه اوشاقلار قتله یئتیریلدی. مینلرله آذربایجانلی یارالانیب و علیل اولدولار. بو وحشیجه هجومدا داغلیق قاراباغ منطقه‌سیندن علاوه آذربایجان رئسپوبلیکاسی‌نین 7 شهر و رایونو دا تجاووزکار ائرمنیستان سلاحلی قوه‌لری طرفیندن اشغال ائدیلدی. بو ایشغال نتیجه‌سینده بیر میلیونا یاخین آذربایجان وطنداشلاری اؤز دوغما یوردلاریندان قووولا‌راق دیدرگین دوشدولر.
نهایت، 1372-جی گونش ایلینده(1993) روسیا، آوروپا و آمئریکا دؤولتلری‌نین آراجیلیق‌لاری ایله ایکی اؤلکه آراسیندا آتشکس رئژیمی برقرار اولدو.
همین ایلده بلاروس پایتخی- مینسک شهرینده ائرمنیستان-آذربایجان و یوخاریدا آدی چکیلن واسیطهچی دؤولت‌لرین نماینده‌لریندن عبارت بیر کونفرانس کئچیریلدی. بو کونفرانسدا مناقیشه‌نین صلح یولو ایله حل اولونماسی اوچون اوچ دؤولتین- آمئریکا، روسیا و فرانسا نمایندلریندن عبارت ایش قروپو(مینسک قروپو) یارادیلدی.
یارانمیش مناقشه و ائرمنیستانین اراضی ادعاسی بیرلشمیش میللتلر تشکیلاتیندا دا مذاکیره اولوندو. بیرلشمیش میللتلر تشکیلاتینین چیخارتدیغی قرارلاردا ائرمنیستان تجاووزکار دؤولتی کیمی تانیندی. اشغال اولونموش اراضی‌لر و داغلیق قاراباغ منطقه‌سی آذربایجان اراضیسی اعلان ائدیله‌رک اشغالچی ائرمنیستان دؤولتیندن اشغال اولونان اراضی‌نین بوشالدیلماسی طلبی ایره‌لی سورولدو. آذربایجان دؤولتیندن قاراباغ منطقه‌سینده یاشایان ائرمنیلرین حقوقلاری‌نین تانینماسی، یعنی بیر موختار ویلایت اولماسی ایستهنیلدی.
آذربایجان دؤولتی دفعه‌لرله قاراباغین موختار بیر ویلایت اولماسینی تانیماقلا یاناشی، ائرمنی‌لره یوکسک حقوقون وئریلمه‌سینه(آذربایجان اراضی‌سینده گئنیش موختاریتین وئریلمه‌سی) حاضر اولدوغونو بیان ائتمه‌سینه باخمایا‌راق، تأسفله ایندییه قدر طرف‌لرله مینسک قروپونون مذاکیره‌سی بیر نتیجه وئرمهمیش‌دیر.
27 ایل عرضینده ایکی طرف آراسیندا رسمی آتشکسین برقرار اولماسینا باخمایا‌راق ائرمنیستان سلاحلی قوه‌لری طرفیندن جبهه بویو دفعه‌لرله بو آتشکس رژیمی پوزولموشدور. هر دفعه قطیعتله آذربایجان اوردوسو طرفیندن جاواب آتشیله قارشیلانمیشدیر.
لاکین بو دفعه قاراباغ جبهه‌سیندن یوزلر کیلومتر اوزاقدا، یعنی گنجه و گرجستان سرحددی آراسیندا یئرلشن “توووز” منطقه‌سینده آذربایجان اراضیسی ائرمنیستان سلاحلی قوه‌لری‌نین موفقیت‌سیز تجاووزونه معروض قالدی.
بعضی سیاسی ائکسپئرتلر ائله دوشونورلر کی، محاربه اوچون تجاووزکار ائرمنیستان دؤولتی‌نین بو منطقهنی سئچمه‌سی‌نین سببی گرجستان، تورکیه واسطه‌سی ایله آوروپایا داشینان نفت-گاز بورولاری‌نین کئچدیگی بؤلگه اولماسی‌دیر. بو منطقه آذربایجان و یوخاریدا آدلاری چکیلن دؤولت‌لر اوچون استراتژی اهمیته مالیک بیر بؤلگه‌دیر.
همین ائکسپئرت‌لرین سؤیلهدیک‌لرینه گؤره اگر ائرمنیستان بو منطقهنی اشغال ائدیب، آذربایجان نفت-گازی‌نین اخراجیندا جدی مانعه یاراتدیقدا، لابد منفعتی اولان دؤولت‌لر ده آچیق و گیزلی شکیلده بو مناقشه‌یه مداخیله ائمه‌لیدی‌لر.
نفوذلو دونیا اجتیماعیت‌لر، او جمله‌دن بیرلشمیش میللتلر تشکیلاتی، مینسک قروپو و منطقه‌نین گوجلو دؤولت‌لری بو داغیدیجی محاربه‌نین آلوولانماسینا راضی اولا بیلمزلر. بو سببدن ده اونلار ائرمنیستان دؤولتینی مجبور ائتمه‌لی‌دیرلر کی، محاریبه‌سیز، صلح یولو ایله اشغال ائتدیگی آذربایجان تورپاقلاریندان چیخا‌راق، اونون اراضی بوتؤو‌لوگونه و دؤولت مستقلیگینه حؤرمت ائتسین.
بئله‌لیکله کئچمیشده اولدوغو کیمی اگر آذربایجان دؤولتی و خالقی اؤز حاقلی حقوقوندان محروم قالارسا، اونو، اشغال اولونموش اراضی‌سینی آزاد ائتمه‌سی و تورپاق بوتؤو‌لوگونون برپاسی اوغروندا آپاردیغی شرفلی مبارزه اوچون قیناماق اولماز.
آذربایجان دئموکرات فیرقه‌سی آذربایجان رئسپوبلیکاسی‌نین اراضی‌سینی اشغال ائتدیگی اوچون ائرمنیستان دؤولتینی محکوم ائده‌رک، دایما آذربایجانلی قارداش و باجی‌لاری‌نین یانیندا دوراراق، اونلارین حاق مبارزه‌سینی مدافعه ائدیب، گله جکده ده ائده‌جک‌دیر.
آذربایجان دئموکرات فیرقه‌سی مرکزی کومیته‌سی
26 تیر 1399
16 یول 2020