فیریدونون سون گونو
تبریز، گولوستان باغی،
فیریدونون سون گونو.
او، قاچمادی وطندن
او، سئچمه دی سورگونو…
گولشنین اورتاسیندا،
دار آغاجینی سئچدی.
آزادلیغا ایناندی،
آزادلیغا آند ایچدی.
اؤلوموندن قورخماییر،
روحو، عشقی گؤیده دیر.
او، حیاتا کئچمه ین
قانونلارچون گؤینه دی.
کندلری بیر- بیر گزن،
خالقا ساواد اؤیره دن.
اوشاقلار ایله بعضن،
قبیر اوسته گؤروشن…
درسلری قبیر اوسته
یازیب، پوزان معلم.
درمان تک نوسخه- نوسخه،
خالقین دردینه حاکم.
فیریدون ایبراهیمی.
***
کؤینیی قیزیل گولدو،
آزادلیغا آچیلان.
سانکی فیریدون دئییل
خالقین آزادلیغیدیر،
ایندی داردان آسیلان.
تبریز خیابانلاری
دئیین چاتدیمی سونا.
اوخشادیغی بو گوللر
علین اوزا‌دیر اونا…
– بیزیم قلبیمیزده سن،
هئچ یئره گئتمییرسن.
– سن یئنه گله‌جکسن،
اؤلمه میشدن، اؤلمه دین،
هله گولمسییرسن!
ایزدیهام دالغا‌لانیر،
– قیراق بو کندیرلری!
قلبینده آپارماسین،
قوی گله‌جک گونلری!
– قیرغینا یول وئرمیین،
ساکیتلشین دئییر: او.
یومروقلا عدالتین،
قاپی سینی دؤیور او.
– بیز تزه دن گلجییک،
خالق آزادلیق آلا‌جاق.
بو وطنیم، بو خالقیم…
آزادلیغا قالا‌جاق!
ظلمه نه دؤز ، نه اییل!
وطن شاه‌لارین دئییل!
شاه‌لار ابدی دئییل!
بو اصول، بو ایداره،
بیلین ابدی دئییل!
***
تبریز گولوستان باغی
بیر ایگیدین سون گونو…
او، قاچمادی وطندن،
او، سئچمه دی سورگونو!
او، سئچدی دار آغاجین،
آزادلیغا آپارسین.
روحو بیر گؤی گؤیرچین،
اونو یئردن قوپارسین.
ایسته دی اوزاق دوشسون،
یئرین، ظلمون گؤزوندن.
شفقلر سوزولوردو،
فیریدونون اوزوندن.
“21- ی آذر” این
عدالت قانونلاری.
یازیلیردی الی ایله.
او، اؤلمه یه گئتمیردی،
گله‌جه یه گئدیردی،
عظمیله، هونریله.
******
قارداش بو گون،
١٠٠ یاشین دا تامام اولدو.
یاش دئییم می بو عمرونه.
سنین عمرون یاشا گلمز.
ابدیت شاهینلری،
عمور بیلمز!
سنین عمرون وطنیمین
گؤیلرینده،
دان اولدوزو.
آغ گونلره چیخارا‌جاق،
خالقیمیزی، یوردوموزو.
سنین عمرون بیر ابدی،
سؤنمز معشل.
سنین عمرون دوننیمدن،
بو گونومه اوزانان ال!
سنین عمرون عمورلرین
باهاسیدیر.
سنین یوردون انقلابلار
یوواسیدیر!