آذربایجان خالق یازیچیسی، اجتماعی خادیم، تواضعکار اینسان و علم خادیمی غلام حسین فرنودون اؤلوم خبری بیزی دریندن کدرلندیریب، سارسیتدی.
غلام حسین فرنودون یاخینلاریندان بیری اونون باره‌سینده بئله سؤیلمیش‌دیر: “غلام حسین فرنود ایران و آذربایجانی‌نین مدنیتی‌نین چیچکلندیگی دؤورونده یوکسلدی. او، صمد بهرنگی، غلام حسین سایدی و … کیمی ضیا‌لی و سیاسی-اجتماعی خادیم‌لر نسلینه منسوب اولموشدور. اونلار کیمی اؤز یئرلی و میللی مدنیتینی اینکیشاف ائتدیرمک، هابئله اونو باشقا مدنیت دونیاسینا تانیت‌دیرماق اوچون گئجه-گوندوز یورولما‌دان چالیشمیش‌دیر. فرنود نسلی‌نین ضیا‌لی‌لاری ائله بیر خصوصیت‌لره مالیکدی‌لر کی، تأسفله اونلاردان سونرا آذربایجان تاریخینده هئچ واخت تکرار اولمامیش‌دیر. اونلار اؤز دوشونجه و اینام‌لاری‌نین تبلیغینده آچیق و جسارتلی اولموش‌لار و بو دا اونلارین خصوصی اؤزللیک‌لری اولاراق بو نسلی باشقا نسیللردن فرقلندیریر. دئمک اولار کی، فرنود بو ضیا‌لی‌لار مکتبی‌نین قورویوجوسو و داوامچی‌سی ایدی.
گؤزل دوشونجه و باخیش اونا ائله بیر دونیاگؤروشو ارمغان ائتمیش‌دیر کی، اطرافیندا اولان حقیقت‌لرین هرچند آجی دا اولسا بیان ائتمه‌سینی بیر هدف کیمی قارشییا مقصد قویموش‌دور. یعنی اطرافین‌داکی اینسان‌لاری گؤروندوک‌لری دئییل، اولدوق‌لاری کیمی قبول ائدیب بیان ائتمه‌سی اونون بو دونیاگؤروشوندن دوغوردو. بو اوزدن ده فرنودو تانییان‌لار اونون بو دونیاگروشوندن دوغان “ائستئتیکا” و ائستئتیکا شوناسلیق ائله بیر کاتئقوریا اولاراق اونون بوتون ووجودونا هوپموش‌دور. حتی، دوستلارینا نسبت بو اینسانلیق و ملاحت‌لی دویغو اؤزنهقاپانما دؤورونده ده اونونلا یولداشلیق ائتمیش‌دیر.
غلام حسین فرنود آدسیز و پاک یاشاماغی شؤهرت‌پرست‌لیک و مادی زنگین‌لییه اوستون توتا‌راق دایما بیر شففاف و دورو چای کیمی آخمیش‌دیر. دوست‌لارا دورر، لعل و دؤورونه طراوت بخش ائتمیش‌دیر.
غلام حسین فرنوددان اونلارلا کیتاب، دیسسئرتاسیا و یوزلرله دهیرلی مقاله‌لر یادیگار اولاراق قالمیش‌دیر. گنج‌لرین تعلیم-تربیه‌سینده اونون اؤنم‌لی رولو اولموشدور. یاشاییشی‌نین آغیر و مشققتلی اولماسینا باخمایا‌راق، هئچ نه اومما‌دان گنج نسلی تربییه ائتمکدن بیر آندا اولسا چکینمهمیش‌دیر. ادبیات، هنر و مدنیت ساحه‌سینده اونون تربیه ائتدیگی طلبه‌لرین بیر چوخو بو گون عالیم‌لیک مقامینا یوکسلمیش‌لر.
آذربایجان دئموکرات فیرقه‌سی اوستاد غلام حسین فرنودون یوخلوغونو آذربایجان مدنی جمعیتی‌نین بؤیوک ایتکی‌سی حساب ائدیر. بو اجتماعی خاتیمین دونیاسینی ترک ائتمه‌سی مناسیبتی ایله آذربایجان خالقینا، ایران مدنی جمعیتینه و خصوصیله مرحومون عائله عضو‌لرینه درین هوزنله باشساغ‌لیغی وئریر.
۱۴.اسفند.۱٣٩۸