اونو ایلک دفعه تبریزده، آذربایجان دمکرات جاوانلار تشکیلاتینین قورولتایندا گؤرمؤشم
ایللر، ناغیللاردا دئییلدیی کیمی سانکی قوش قانادیندا پرواز ائدیر. تزلیکله، فریدون سئوَن لرین ایشتیراکی ایله اونون آنیم مراسیمینه توپلاشاجاغیق. اونا حُسن- رغبتلرین سایا گلمزلیینه استناداً بیلیرم کی، تدبیرده غلبه‌‌لیک حؤکم سوره جک. اوسته‌لیک بو قبیلدن چوخ سایلی انسانلارین قیناغینا دا توش گلجه ییک. چونکی فریدون ابراهیمی او تایلی، بو تایلی میلیونلارین قلبینده اؤزونه ابدی مسکن سالان، غبطه ائدیله‌جک شخصیتلردن دیر.
هئچ شبهه سیز ، بئله نیک بین دؤیغولاردان غرور دؤیارکن گؤزلریم سالن دا اونو گؤره نلری، اونون الینی سیخانلاری آختاراجاق. جمعی اوچ نفر قالدیغیمیزدان، نئجه دیانتلی شخصلری ایتیردییمیزدن سیخینتی کچیرسمده، ائل محببتی، فریدون ابراهیمینی تاریخده، کؤنوللرده ابدی ساخلاماغی اؤزلرینه بورج بیلنلرین ایل بَه ایل آرتدیغینین شاهیدی اولماقدان ذوق آلاجاغام…
من فریدون ابراهیمینی ایلک دفعه 1325-جی ایل تیر آیی نین 15-ده ، تبریزده «آذربایجان دمکرات جاوانلار تشکیلاتی»-نین بیرینجی قورولتاییندا گؤرموشم. اردبیلدن 3 نفر نماینده سئچیلمیشدی: ایران دا مشهور سلطانوف لارین داییسی رحیم مباهی، مختار دیده کنان (او، مهاجرت ده اؤزؤن ایللر آذربایجان دمکرات فرقه سی مرکزی کمیته سینین تشکیلات شعبه سینین مدیری ایشله یب) و بیر ده من، 3 گون شهر مسافرخانا سیندا قالدیق. هاوا چوخ سویوق ایدی، ائله بیل قیش گلمیشدی.
قورولتای اوچون تبریزین اَن بؤیوک سالُنی آیریلمیشدی. آذربایجانین هر یئریندن سئچیلن اونلارلا گنج اوغلان و قیز نیک بین لیک حیسّی ایله عالی مجلیسه قاتیلمیشدی. شاعره مدینه گولگون له ده اورادا تانیش اولدوم. بیزدن مختار دیده کنان چیخیش ائتدی و «21 آذر» حرکاتینین نائلیت لرینین قورونماسی اوچون اردبیل جاوانلارینین هر جوره فداکارلیغا حاضر اولدوغونو بیلدیردی. منی فریدون ابراهیمی ایله ده ، او، تانیش ائتدی.
سونراکی ایللرده خالق یازیچیسی میرزه ابراهیمووون «گله‌جک گون» رُمانیندا همین شؤمال گؤرکملی، شوخ گئییملی، ظابطه‌لی گنجین شخصییتی حاققندا تصویرینی اوخویارکن ، سانیرام او جانلی انسان صورتینده منی یئنه سالاملاییر، خوش احوال- روحیه مه یئنی نیک بین لیک روحو علاوه ائدیر.
اصلینده او واقتا قدر سیماسینی گؤرمه سمده ، اردبیل جاوانلارینین اکثری کیمی، من ده فریدون ابراهیمینی غیابی تانیییریدیم. «آژیر» و «آذربایجان» قزئتلرینده کی دولغون وطنپرور مقاله لرینین قازاندیردیغی پرستیشکارلاری سایا گلمز ایدی. 27 یاشلی حقوقشوناسین آذربایجان ملّی حکومتینین دادستان کلّ تعین ائدیلمه سی تعجب دوغورسا دا، قیسّا مدت‌ده مسئله لره غرض سیز یاناشماسی، قانونو، عدالتلی اوستون توتماسی، حاقی تاپدانانلارین یانین‌دا اولماسی ایله، درین رغبت قازانمیشدی.
بونا گؤره ده ، قورولتایدا قیسا، منطیقی چیخیشی دفعه لرله آلقیشلاندی. چوخ تأسفکی، بو، بیرینجی و سونونجو گؤروشوموز اولدو. اما ابدی خاطره کیمی یادداشیمدا قالدی.
بیر نئچه کلمه ده همین قورولتای باره ده صحبت آچماق ایستردیم. اورادا گنجلرین 20 تشکیلاتیندان 107 نماینده ایشتیراک ائدیردی. اَول سید جعفر پیشه ورینین بیرینجی قورولتایا تبریک مکتوبو اوخون‌دو. او، خسته لییه گؤره اشتراک ائده بیلمدیگی اوچون عذرخاهلیق ائدیر، عالی مجلی‌سین ایشینه اوغورلار آرزولاییردی. رهبر، جاوانلاری یئنی قورولوشون گله جگی آدلاندیریر، پروگرام خصوصییتی اولان مکتوبوندا گؤستریردی کی، معاریف سیز و معلومات سیز بیر ملت بو گونکی دونیادا سعادته چاتا بیلمز. کُور- کُورانه حرکت ائد‌ن بیر جمعیت سوندا هئچ بیر یانا چیخا بیلمز و صحرالاردا چاشیب قالار. بیزیم هدفیمیز اول آذربایجان خالقینین آزادلیغینی تأمین ائدیب، سونرا ایراندا دمکراتیک رژیمی برپا ائتمکله ایرانلی لارین هامیسینی ارتجاع بویوندوروغی(یوغی) آلتیندان نجات وئرمکدیر… من گنجلریمیزین آز بیر زماندا بؤیوک موفقیت لر قازانماسینی، خصوصاً اؤزلرینین بیرینجی قورولتایلارینی تشکیل ائتمه یه موفق اولمالارینی اوغور ساییرام.
قورولتایدا تشکیلاتین مرامنامه و نظامنامه سی قبول اولوندو، مرکزی کومیته نین ریاست هیأتی نینن عضولویونه محمد باقر زهدابی، اقدس خانم ممی‌زاده، حمید محمدزاده، حمید صفری، اسلام صرافی، برهان الدین صبوحی، علی شمیده، چشم آذر، آقازاده(صدر) و باشقالاری سئچیلدیلر. قید ائدیم کی، بو تشکیلاتین 20 یاشا چاتمیش گنجلرینین انجمن سئچکیلرینده فعال اشتراکی، کارگر و کندلیلرین ساوادلانمالارینا، اونلارین افسرلیک و اختصاص مکتبلرینه گؤندریلمه لرینه، شهرلرده آساییشین قورونماسینا، فدائی و خلق قوشونلاری دسته لرینه کنسرت و تاماشالار وئریلمه سینه، اؤن جبهه دکی فدائیلرین عائله لری ایله علاقه ساخلامالارینا، تیکینتی و آبادلیق ایشلرینده خلق حاکمیتینه کمک گؤسترمه لری بیر وظیفه اولاراق اونلارا حواله ائدیلمیشدی. قورولتایدا بو مسئله لردن اطرافلی صحبت گئتدی و بیر سیرا قرارلار قبول اولوندو.
بیلیرسیز، من ، هم ده ابراهیمیلر نسلینین حیرانییام. غنی کیشی ایله یاناشی اؤولادلاری فریدون و انوشیروانین دا آدلاری مبارزه تاریخیمیزه حک اولونوب. ایرج خانم اَن گنج فدائی ساییلیردی. تاریخ علملری دُکترو ایراندوخت خانیمین دا قلمی، آختاریشلاری سونادک حق ایشینه خدمت ائتدی. بو اؤزو ده بؤیوک خوشبختلیکدیر!
عادله چرنیک بلند،
طب علملری دُکتُرو،
«ایرانلی مهاجرلر جمعیتی»
اجتماعی بیرلیینین اداره هیأتینین عضوو.